Y tu ôl i'r Sîn gyda NOAH BUCHARD

Mae Noah Bouchard yn artist hip-hop Cymreig sy’n cael ei gydnabod am ei straeon telynegol a’i fregusrwydd.  Fel rhan o’n cyfres ffotograffau wedi’i chomisiynu gan Ren Faulkner, sy’n cynnwys artistiaid cyffrous naill ai o Gaerdydd neu sydd â chysylltiad â Chaerdydd, wnaethon ni ddal i fyny gyda Noah a siarad am yr hyn sy’n ei ddylanwadau, hunanholi ac Aduniad Outkast…

 DARLLENWCH EIN CYFWELIAD GYDA NOAH BUCHARD

Beth oedd yr artist, yr albwm neu’r gân gyntaf a wnaeth i chi syrthio mewn cariad â cherddoriaeth?

Mae’n anodd nodi’r union foment, ond cefais fy magu yn clywed llawer o Bowie, The Cure, The Clash, Joy Division a Paul Weller. Roeddwn i’n dwlu ar y Jackson Five yn blentyn hefyd. Dwi’n credu pan oeddwn ychydig yn hŷn y clywais Paper Planes gan MIA, pan ddaeth yn amlwg i fi sut gallai cerddoriaeth gario neges gymdeithasol gref tra bod yn hwyl i wrando arni hefyd. Yna des i ar draws cerddoriaeth grime yn fy arddegau (Ghetts, Devlin, JME ac ati) a newidiodd popeth o fan ‘na.

Oes unrhyw ffynonellau annisgwyl o ysbrydoliaeth sy’n dylanwadu ar eich gwaith?

Mae celf yn gallu fy ysbrydoli ar bob ffurf, yn enwedig o ran ysgrifennu a pherfformio. Dwi’n edmygu James Acaster yn fawr ac wedi bod yn meddwl llawer am sut mae’n defnyddio naratif ac emosiynau amrwd, yn ogystal â negeseuon gwleidyddol, yn ei gomedi ond eto mae’n eu gorchuddio gyda’r cymeriadau swreal, theatraidd a’r straeon hyn fel y gallwch wylio’r cymeriadau yn cwympo ar wahân o flaen eich llygaid ac yn datgelu gwir arc y perfformiad. Dwi’n credu ei fod wedi’i ysgrifennu’n gywrain iawn a’i fod yn llawn ysbrydoliaeth. Dwi’n dal i geisio dysgu sut i ddefnyddio’r fath dechnegau yn fy ngherddoriaeth.

Pe gallech ddewis unrhyw 3 artist yn y byd i berfformio mewn Gŵyl Dinas Gerdd Caerdydd yn y dyfodol, pwy byddech chi’n ei ddewis?

Mae angen aduniad Outkast arna i, Amaarae a Sade.

Oes ’na ran o Gaerdydd sy’n teimlo’n arbennig o gysylltiedig â’ch cerddoriaeth neu eich taith bersonol fel artist?

Roeddwn i’n arfer mynd i Ganolfan Gymunedol Howardian pan oeddwn yn fy arddegau i wneud fy recordiadau cyntaf. Dyw hi ddim yn bodoli rhagor, ond roedd yn drawsnewidiol gallu mynd i le fforddiadwy ar yr oedran hwnnw i arbrofi gyda cherddoriaeth a dysgu’r sgiliau recordio sydd dal gyda fi heddiw.

Beth yw eich hoff atgof o gig yng Nghaerdydd, naill ai un rydych chi wedi mynd iddo neu un rydych wedi’i berfformio, a beth wnaeth e mor arbennig?

Yn ddiweddar chwaraeais fy sioe gyntaf lle ni oedd y brif act yn Paradise Garden. Roedd hi’n noson hyfryd a bues i fwynhau mas draw! Hwn hefyd oedd y tro cyntaf i mi berfformio fy nghaneuon gyda band llawn a oedd wir yn ei gwneud yn arbennig. Rydym yn edrych ymlaen at wneud mwy o hyn. O ran gigs dwi wedi bod iddynt, dim ond neithiwr es i weld Nick Cave yng Nghaerdydd! Fe yw un o’m hoff gyfansoddwyr caneuon ac felly roedd yn anhygoel eu gweld yn cael eu perfformio. Roedd yn sioe wych.

Pa artistiaid Cymreig sy’n gwneud pethau cyffrous ar hyn o bryd ac yn haeddu sylw pobl, yn eich barn chi?

Mae Luke RV, Harry Jowett a Kiddus i gyd yn artistiaid Cymreig y dylen ni fod yn gwrando arnyn nhw.

Pe gallech chi gydweithio ag unrhyw artist neu gynhyrchydd, pwy byddech chi’n ei ddewis?

Mae fy ateb i’r cwestiwn hwn yn newid yn gyson. Heddiw, James Blake neu Corinne Bailey Rae dwi’n meddwl.

Llongyfarchiadau ar ennill gwobr Awdur Geiriau’r Flwyddyn yn y Gwobrau Cerddoriaeth Ieuenctid. Sut deimlad oedd cael y math hwnnw o gydnabyddiaeth?

Diolch! Roedd hi’n noson wych. Ces i’r cyfle i gwrdd â llawer o bobl sy’n ysbrydoli ac roedd ennill y wobr yn foment arbennig. Dwi’n ymfalchïo yn fy ngwaith ysgrifennu, felly mae’n braf cael cydnabyddiaeth amdano.

Mae eich cerddoriaeth yn fewnblyg iawn, ac yn onest. Beth ydych chi’n gobeithio bod gwrandawyr yn gallu ei dynnu i ffwrdd o glywed eich cerddoriaeth?

Dwi am fod mor ddiamddiffyn ag y galla i fod a dwi’n gobeithio, trwy wneud hynny, y galla i uniaethu â’m gwrandawyr a’u grymuso i wneud yr un peth. Dwi’n credu po fwyaf diamddiffyn y gallwn ganiatáu i ni ein hunain fod, a po fwyaf y gallwn gefnogi ac ymddiried yn y bobl o’n cwmpas, y mwyaf y gall eraill deimlo’n gyfforddus i fynegi eu gwir hunain a’r hapusach y gallwn ni fod fel cymuned.

PWY YW NOAH BUCHARD?

Mae Noah Bouchard yn artist hip-hop Cymreig sy’n cael ei gydnabod am ei straeon telynegol a’i fregusrwydd. Arweiniodd ei sain a’i arddull unigryw at ei ddewis ar gyfer Cronfa NextGen (2023) a rhestr ‘Ones To Watch’ Youth Music (2024), yn ogystal â chael gwobr ‘cyfansoddwr geiriau’ Youth Music yn 2024.

Mae Noah wedi rhyddhau nifer o senglau a phrosiectau, gan gynnwys ei gân Pantomime, gyda dros 3.5 miliwn o ffrydiau. Mae ei gerddoriaeth wedi ymddangos ar BBC Radio 1Xtra, BBC Radio Wales, Reprezent Radio, Unity Radio a llawer mwy, yn ogystal â rhestr chwarae ‘Fresh Finds’ Spotify yn y Deyrnas Unedig ac Iwerddon ar ôl cael ei gydnabod ar restr chwarae ‘New Music Friday’ Spotify.

Mae albwm gyntaf Noah, ‘Love Of My Life’, yn albwm gysyniadol sy’n ail-fyw ei daith o hunan-dderbyn, maddeuant ac ailddarganfod llawenydd mewn bywyd.

GWRANDEWCH AR NOAH